0 
0 નમ્રતાગ્રીન ફાઉન્ડેશન અને બોલબાલા દ્વારા જેતલસરમાં મહેંદી સ્પર્ધાનું ભવ્ય આયોજન; વિજેતા દીકરીઓને ઇનામ વિતરણ કરાયા
”દીકરીઓના હસ્તે ખીલી મહેંદીની કળા, જેતલસર ગામમાં ફેલાઈ સંસ્કારની પ્રભા.”
જેતલસર: તાજેતરમાં જેતલસર ગામ ખાતે સામાજિક ક્ષેત્રે કાર્યરત ‘નમ્રતાગ્રીન ફાઉન્ડેશન’ અને ‘બોલબાલા’ના સંયુક્ત ઉપક્રમે દીકરીઓના કૌશલ્યને પ્રોત્સાહન આપવા માટે એક ભવ્ય મહેંદી સ્પર્ધાનું આયોજન કરવામાં આવ્યું હતું.
આ સમગ્ર કાર્યક્રમનું આયોજન સંસ્થાના પ્રમુખ શ્રી મહેન્દ્રભાઈ આયલાણીના નેતૃત્વ અને માર્ગદર્શન હેઠળ સફળતાપૂર્વક સંપન્ન થયું હતું.
આ કાર્યક્રમમાં મુખ્ય અતિથિ તરીકે જૂનાગઢ જિલ્લા પ્રમુખ શ્રી રાહુલભાઈ માકડિયા તેમજ જિલ્લા મહિલા મોરચા પ્રમુખ શ્રીમતી કાજલબેન વાળા ખાસ ઉપસ્થિત રહ્યા હતા. આ સાથે જેતલસરના સરપંચશ્રી ભીખાલભાઈ ગુજરાતી, આચાર્યશ્રી હંસાબેન ફાગડા તેમજ શાળાનો શિક્ષક ગણ જેમાં દિનેશભાઈ રાહડીયા, જલ્પાબેન માવાણી, મમતાબેન ભંડેરી અને સુરક્ષાબેન મારકણાએ પ્રેરક હાજરી આપી દીકરીઓનો ઉત્સાહ વધાર્યો હતો.
મહાનુભાવોના હસ્તે ઇનામ વિતરણ:
સ્પર્ધામાં ગામની અનેક બાળાઓએ ઉત્સાહપૂર્વક ભાગ લઈ પોતાની કળાનું પ્રદર્શન કર્યું હતું. કાર્યક્રમના અંતે શ્રેષ્ઠ દેખાવ કરનાર વિજેતા દીકરીઓને જિલ્લા પ્રમુખ શ્રી રાહુલભાઈ માકડિયા અને મહિલા મોરચા પ્રમુખ શ્રીમતી કાજલબેન વાળાના વરદહસ્તે ઇનામ વિતરણ કરવામાં આવ્યું હતું. તમામ વિજેતાઓને ઇનામો આપી સન્માનિત કરાયા હતા અને ભાગ લેનાર તમામ દીકરીઓને પ્રોત્સાહિત કરવામાં આવી હતી.
સંસ્થાના પ્રમુખ શ્રી મહેન્દ્રભાઈ આયલાણીએ જણાવ્યું હતું કે, નમ્રતાગ્રીન ફાઉન્ડેશન અને બોલબાલા દ્વારા ગ્રામીણ દીકરીઓને યોગ્ય પ્લેટફોર્મ પૂરું પાડવાનો આ એક વિનમ્ર પ્રયાસ છે. કાર્યક્રમને સફળ બનાવવા માટે શાળાના સ્ટાફ અને બંને સંસ્થાના કાર્યકરોએ ભારે જહેમત ઉઠાવી હતી.
